Sunday, November 21, 2010

ඔබ විදුලි ඉස්‌ත්‍රික්‌කය භාවිත කරන්නේ හරි විදිහටද?

ආහාර පාන මෙන්ම ඇඳුම් පැළඳුම්ද මිනිසාගේ මූලික අවශ්‍යතාවයකි. අප අඳින පළඳින ආකාරයෙන් අපගේ පෞරුෂත්වයද රැකේ. එහෙයින් මනාව ඇඳ පැළඳ එදිනෙදා කටයුතුවල නියෑලීමට බොහෝ දෙනෙක්‌ උනන්දු වෙයි. පාසල් ළමුන් මෙන්ම කාර්යාල සේවක සේවිකාවන්, හා එදිනෙදා ගමන් බිමන් යන්නන්ද තම ඇඳුම් පැළඳුම් ගැන වඩ වඩාත් සැලකිල්ලක්‌ දක්‌වයි.

එදිනෙදා සෝදා පිරිසිදු කරගන්නා ඇඳුම් සේදිමේදී පොඩිවෙයි. ඒ හෙයින් බොහෝ දෙනෙක්‌ ඇඳුම් අලංකාරව තබා ගැනීමට රෙදි මැදීමත් සිදු කරයි.

එහෙයින් ලක්‌ෂ ගණනක්‌ විදුලි පාරිභෝගික නිවාසවල ඉස්‌ත්‍රික්‌කය අත්‍යවශ්‍ය විදුලි භාණ්‌ඩයක්‌ වන අතර එය දින පතාම පරිහරණයද කරයි.

විදුලි ඉස්‌ත්‍රික්‌කයට වැඩි විදුලි බිල ඒකක ප්‍රමාණයක්‌ වැයවන බව දන්නේ ඉතා සුළු පිරිසකි. ඒ ගැන අවබෝධයෙන් යුක්‌තව වෙළඳ පොළෙන් විදුලි ඉස්‌ත්‍රික්‌කයක්‌ මිළදී ගැනිමේදී ඔබ ගත යුත්තේ කාර්යක්‌ෂමතාවයෙන් ඉහළ විදුලි ඉස්‌ත්‍රික්‌කයක්‌ය.

අද වනවිට වෙළඳ පොළේ විවිධ වර්ගයේ විදුලි ඉස්‌ත්‍රික්‌ක දක්‌නට හැකියි. ස්‌වයංක්‍රියව ක්‍රියාත්මක වන විදුලි ඉස්‌ත්‍රික්‌ක ඉහළ කාර්යක්‌ෂමතාවයක්‌ සහිතව ස්‌ටීම් අයන් හෙවත් ජලවාෂ්ප පිටකළ හැකි විදුලි ඉස්‌ත්‍රික්‌කය පාවිච්චි කර රෙදි මැදිමේදී වඩා ඉක්‌මනින් රෙදි මැද ගැනීමට හැකිය. මෙය විශාල වශයෙන් රෙදි මදින ස්‌ථාන වලට සුදුසු වේ.

ඔබ විදුලි ඉස්‌ත්‍රික්‌කයක්‌ මිළදී ගැනීමේ දී අවශ්‍යතාවය අනුව ඉහළ කාර්යක්‌ෂමතාවයකින් යුත් විදුලි ඉස්‌ත්‍රික්‌කයක්‌ මිළදී ගැනීමට සැලකිලිමත්වන්න.

සාමාන්‍යයෙන් විදුලි ඉස්‌ත්‍රික්‌කයක්‌a වොට්‌ 750 සිට 1000 ක්‌ අතර විදුලි පරිපථය හා සම්බන්ධ කළ විට ආරම්භයේදී රත්වීම සඳහා ලබා ගනියි. විදුලි ධාරිතාව එහි සඳහන් කර ඇති උපරිමය ලබා ගනියි. ඉස්‌ත්‍රික්‌කයකින් රත්වන විට එහි විදුලිය වැයවීම ක්‍රමයෙන් අඩුවෙයි. මේ නිසා ඔබට මැදීමට තිබෙන රෙදි එකවර මැද ගැනීම විදුලි පරිභෝජනය අතින් වඩාත් වැදගත්ය. හැමවිටම රෙදි මැදීමේදී දින කිහිපයක්‌ සඳහා එකවර රෙදි මැද ගැනීම සුදුසුය. එය ඔබේ විදුලි බල අඩුකරගැනීමට මඟක්‌ද වෙයි.

වොට්‌ 1000 ක්‌ විදුලි ඉස්‌ත්‍රික්‌කයක්‌ විනාඩි 05 ක්‌ ඇතුළතදී රෙදි මදින නිවසක ඒ සඳහා විදුලි ඒකක 6-8 අතර ප්‍රමාණයක්‌ මාසයකට විදුලි බිලට එකතුවෙයි. දින කිහිපයක්‌ රෙදි එකවර මැද ගැනීමෙන් මෙම විදුලි ඒකක ප්‍රමාණය අවම කර ගත හැකිය.

සමහර විදුලි පාරිභෝගිකයන් තෙත රෙදි මැදීමට පුරුදුව සිටියි. මේ නිසා රෙදි මැදීමට මෙන්ම ජලය ඉවත් කිරීමටද සිදුවන බැවින් අමතර විදුලියක්‌ වැයවේ. මෙය ඉතාම අකාර්යක්‌ෂම විදුලි පාරිභෝජනයකි.

එමෙන් ම රෙදි මදින විට රත්වූ ඉස්‌ත්‍රික්‌කය කිසිදු පෘෂ්ඨයක්‌ මත නොගැටෙන පරිදි කෙලින් අතට සිටුවා තැබීමෙන් තාප හානිය වළක්‌වා ගත හැකිය.

රෙදි මැදීම ආරම්භයේදී බර රෙදි මැදීම මුලින්ම කළ යුතුය. ඉස්‌ත්‍රික්‌කයේ උෂ්ණත්වය පාලනය ඉහළ අතට හරවා මුලින් බර රෙදි මැද ඉන්පසු උෂ්ණත්ව පාලකය අඩු අතට කරකවමින් සැහැල්ලු ඇඳුම් මැදීම අවසානයට කිරීම වඩා කාර්යක්‌ෂමව බව මතක තබා ගන්න.

බොහෝ විට කාර්ය බහුලත්වය නිසා ඇතැමෙකුට රෙදි මැදීමෙන් පසු විදුලි ඉස්‌ත්‍රික්‌කය ක්‍රියා විරහිත කිරීමට අමතක වෙනවා. එය විදුලිය අපතේ යාමට මෙන්ම හදිසි අනතුරකට අත වැනීමක්‌ද වෙනවා.

මීට විසඳුමක්‌ ලෙස මොරටුව විශ්වවිද්‍යාලය මැදීමට භාවිත කළ හැකි නවතම රෙදි මදින මේසයක්‌ හඳුන්වා දී ඇත. එහි විශේෂත්වය වන්නේ එම මේසය මත කිසියම් සෙලවීමක්‌ සිදුනොවී විනාඩි 03 ක්‌ පැවතිවිට ස්‌වයංක්‍රියව මේසය මත ඇති විදුලි ඉස්‌ත්‍රික්‌කයට සැපයෙන විදුලිය විසන්ධි වේ. මෙමඟින් විදුලි බල කාර්යක්‌ෂමතාවයට පමණක්‌ නොව උදෑසන කාර්ය බහුලත්වය නිසා රෙදි මැද ඉස්‌ත්‍රික්‌කය එසේ තිබියදී යාමෙන් සිදුවිය හැකි අනතුරු වළක්‌වා ගැනීමටද හැකිවෙයි.

විදුලි ඉස්‌ත්‍රික්‌කයක්‌ භාවිත කරන ඔබ මෙවන් ක්‍රම සහ විධි පිළිබඳව අවධානයෙන් යොමු කිරීමෙන් ඔබේ මාසික විදුලි බිල යම් තරමකට අඩුකර ගත හැකියි.


චමින්ද ලියනගේ
ජ්‍යෙෂ්ඨ විධායක (නිපුනතා ප්‍රවර්ධන)
සුනිත්‍ය බලශක්‌ති අධිකාරිය

No comments:

Post a Comment